ඊසානදිග මෝසම් තත්ත්වය ක්‍රමයෙන් රට පුරා දක්නට ලැබෙන අතර හෙට (නොවැම්බර් 27) වන විට එය සම්පූර්ණයෙන් ස්ථාපිත වනු ඇතැයි අපේක්ෂා කරන බව, කාලගුණ විද්‍යා දෙපාර්තමේන්තුව පවසනවා.
එබැවින් පවතින වැසි තත්ත්වය හෙට සිට තීව්‍ර වනු ඇති බවයි එම දෙපාර්තමේන්තුව පවසන්නේ.
උතුරු, උතුරු-මැද, නැගෙනහිර සහ වයඹ පළාත්වල මෙන්ම හම්බන්තොට යන දිස්ත්‍රික්කවල වැසි හෝ ගිගුරුම් සහිත වැසි ඇති වේ. දහවල් 1.00 න් පසු අනෙක් ප්‍රදේශවල වැසි හෝ ගිගුරුම් සහිත වැසි අපේක්ෂා කෙරේ.
සබරගමුව, බස්නාහිර, මධ්‍යම, නැගෙනහිර සහ වයඹ පළාත්වල මෙන්ම යාපනය සහ මුලතිව් දිස්ත්‍රික්කවල මිලිමීටර් 75-100 අතර තරමක් තද වැසි ඇති විය හැකියි.
මේ අතර, එක් දින හා කුඩා යාත්‍රා අද දිනයේ ධීවර කටයුතු සඳහා යාමේදී සැලකිලිමත් වන්නැයි ධීවර දෙපාර්තමේන්තුව දැනුම් දෙනවා.
එහි සෝදිසි මෙහෙයුම් අංශයේ සහකාර අධ්‍යක්ෂ පද්මප්‍රිය මහතා පැවසුවේ, දිවයින වටා ඇතැම් මුහුදු ප්‍රදේශ රළුවන බවට කාලගුණ විද්‍යා දෙපාර්තමේන්තුව දැනුම් දී ඇති බවයි.
ගිඟුරුම් සහිත වැසි සමග කන්කසන්තුරේ සිට මන්නාරම හරහා පුත්තලම දක්වා වන ගැඹුරු මුහුදු ප්‍රදේශවල සුළඟේ වේගය පැයට කිලෝමීටර් 70 සිට 80 දක්වා ඉහළ යා හැකි අතර එම මුහුදු ප්‍රදේශ ඉතා රළුවිය හැකි බව කාලගුණ විද්‍යා දෙපාර්තමේන්තුව පවසනවා.
ඇත්ත විත්ති – ඇත්ත ඇති සැටියෙන් දැනගන්න පිවිසෙන්න අපගේ ෆේස්බුක් පිටුවට සහ සමූහයට.
