වර්තමාන වෙළෙඳපොළේ නොයෙකුත් විටමින් සහ ඛනිජ ලවන (ක්ෂුද්‍ර පෝෂක) සිරප් වර්ග බහුලව ඇත. ඇතැම් රෝගීන් වෛද්‍යවරුන් වෙත පැමිණ ඔවුන්ට විටමින් සහිත ඖෂධ ලබා දෙන ලෙස බල කරති.
තවත් අය වෛද්‍ය අනුමැතිය නොමැතිව, එවැනි විටමින් වර්ග වෙළෙඳපොළෙන් ලබා ගනිති. සෞඛ්‍යමත් දිවි පැවැත්මට අමතර විටමින් ගැනීම අත්‍යවශ්‍ය බව බොහෝ දෙනාගේ මතයයි.
ඇතැම් විටමින් වර්ග ශරීරයට අත්‍යවශ්‍ය ය. එනම්, A, B, C, D, E යන විටමින් ද Ca2 + Fe2+ (කැල්සියම් ,යකඩ) Zn, Na+, K+ යන ඛනිජ ලවණ ද ශරීරයට අත්‍යවශ්‍ය ය. මේවා අතරින් සමහර විටමින් සිරුර තුළ නිෂ්පාදනය වන්නේ නැත. එබැවින්, ඒවා ශරීරයට ලබා දීමට තිබෙන්නේ එකම ක්‍රමයකි. ඒ, අප ගන්නා ආහාරවලිනි.
විටමින් B12 එවැනි විටමිනයකි. අප ගන්නා ආහාරයෙන්, ජීර්ණය වූ පසුව හෝ කෙළින්ම හෝ මේවා උරා ගනු ලබන්නේ අන්ත්‍රය මඟිනි. සමහර විටමින් ශරීරයේ ගබඩා වී පවතී. විශේෂයෙන්ම ජලයේ දිය නොවන විටමින් A, D, E, K වර්ග අක්මාවේ තැන්පත්ව ගබඩා වී ඇත. සමතුලිත, සමබර ආහාර වේලක් ගන්නේ නම් සිරුරේ දෛනික අවශ්‍යතා සඳහා ආහාරයේ අඩංගු ක්ෂුද්‍ර පෝෂක ප්‍රමාණවත්ය. නමුත් ඌනතාවක් ඇති වුවහොත් රෝග ලක්ෂණවලින් ඒ බව අපට දැනගත හැකිය.
එවැනි ඌනතා ඇති විට පමණක් වෛද්‍ය උපදෙස් සහිතව මෙම විටමින් සහ ඛනිජලවණ සහිත සිරප් වර්ග ලබා ගැනීම වැදගත් ය. මෙම විටමින් හා ක්ෂුද්‍ර පෝෂක වර්ග වැඩිපුර ශරීරයට ගතහොත් ඒවා විෂ වනු ඇත. එවිට විවිධ රෝග ලක්ෂණ පහළ වනු ඇත. විශේෂයෙන් මේදයේ දිය වන ක්ෂුද්‍ර පෝෂක ශරීරයේ එකතු වී විෂ වනු ඇත. එම නිසා වෛද්‍යවරයකුගේ අනුමැතිය නොමැතිව, අවශ්‍යතාවකින් තොරව කිසිවකු විටමින් භාවිතයට නොගත යුතු ය. වඩාත් වැදගත් වන්නේ සමබර ආහාර ගැනීමයි. තවද විටමින් සහ ක්ෂුද්‍ර පෝෂක අඩංගු සිරප් නිකරුණේ පානය කිරීම ද ඉතා භයානක ය. මේ කරුණු පිළිබඳ නිරන්තරයෙන්, අවධානයෙන් සැලකිලිමත්ව කටයුතු කිරීමෙන් ලොකු, කුඩා සැමට නිරෝගී දිවිපෙවතක් ගත කිරීමට හැකිවනු ඇත.
(උපදෙස් – ආහාර හා පෝෂණ විශේෂඥ වෛද්‍ය සෙලී ප්‍රනාන්දු, සටහන – යශෝදා ඉන්දීවරී)
ඇත්ත විත්ති – ඇත්ත ඇති සැටියෙන් දැනගන්න පිවිසෙන්න අපගේ ෆේස්බුක් පිටුවට සහ සමූහයට.
